Oleh : Zaitun Ul Husna
(Bagian II)
Sakik hatinyo Pandeka Samiang, mandanga muncuang Puti Randin. Namun dek cinto lah tumbuah di dado, baa ka caro si Randin harus dapek juo. Talinteh di pikiran si Samiang wakatu itu, iyo handak pai baguru, tasabuik di daerah Kinali, urang pandai ba ilmu itam, ilmu jari ilmu si jundai, langkok jo ilmu pakasiah. Baniaik si Samiang untuak manuntuik ilmu pakasiah, supayo si Randin manuruik, mamohon maaf jo kato-katonyo sangkek itu.
Samiang mamintak izin bakeh mandeh, ka pai baguru ka kampuang urang, tipak di diri mandehnyo, iyo indak mambari izin. Mandeh nan baharok anaknyo nan surang tungga babeleang, pai baraja ilmu agamo bukannya ilmu pa hanta ka narako. Batambah kareh Samiang malawan, batambah kareh pulo mandeh rubai malarang. Tapi dek si Samiang lah tadayo hawa jo napasu, nasihaik mandeh inyo indak paralu, di ambiak pitih nan tasimpan di aleh-aleh kain mandeh rubai, untuak ka baka salamo di jalan.
Mancaliak tingkah jo parangai si Samiang nan bajadi, tabik bangihnyo si mandeh Rubai, kok saba indak ta sabakan, kok nasehaik indak ba dangakan, hati Samiang iyo sabana kareh, indak mandanga ucapan mandeh.
“Kini ba iko malah dek waang, kok ucapan den indak ang danga lai, nan hiduik den indak ang haragoi, indak den ka manahan waang, indak guno waang di denai lai. Barangkek ang dari rumah den kini,
Pado rumpuik elok lah padi
Pado di siko ancak lah ang pai
Denai alah latiah maaja manasehati
Nan waang tetap basikareh hati.”
Marabo mandeh Rubai, manangih ta isak-isak, mancaliak anak kanduang indak bahati, si Samiang tetap juo barangkek ka Kinali.
Dek lamo lambek di jalan, masuak rimbo kalua rimbo, nan bukik alah di daki, kok lurah nan alah dituruni, alah sapakan duo pakan, minum indak makan pun tidak, uuih ka mano ka mamintak, lapa ka mano mangadu, dalam rimbo piatu nantun. Dek lamo Pulo antaronyo, sampai malah si Samiang di daerah nan di tuju, sampai di tampek nantun, di ucapkan lah niaik sarato tujuannyo.
“Dangakan malah nan dek tuan, tinggi bubuangan rumah darek, nampak nan dari Bukiktinggi, paruntuangan mambao larek, itu lah mako ambo ka mari.”
Manjawek urang sati nan tasabuik di daerah Kinali maso itu,
“Anak urang Simpang Tigo
Nak lalu ka Batang Hari
Bari izin ambo batanyo
Apo tujuan kamanakan kamari?”
Dijalehkan niaik jo tujuan samulo, baa kok Samiang sampai kasiko. Dibari lah si Samiang ilmu mantra, sasuai pintaknyo. Sasudah ilmu di tuntuik, alah paham alah mangarati, babaliak si Samiang pulang, ka nagari Simpang Ampek. Alah sampai di Simpang Ampek, Pandeka Samiang mancari si Puti Randin, handak mancubokan ilmu barunyo, ilmu pakasiah supayo si Randin jatuah cinto.
Takisah wakatu itu, hari nan sadang hujan paneh, indak sangajo takadia mampatamukan, si Randin jo si Samiang. Alah ka sanang hati Pandeka Samiang, urang nan dicari alah nampak, kasiah di hati samakin rancak, mancaliak si randin sadang bahujan paneh. Di himbau malah dek Pandeka samiang,
“Nak urang koto Marapak
Nak ilia batungkek tabu
Hari paneh hujan badapak
Mari lah adiak Baranti dahulu.”
Dijawek molah dek Puti Randin,
“Sajak samulo den latakkan
Indak dilatak dalam padi
Dilatak juo di pamatang
Sajak Samulo den katokan
indak ang latak dalam hati
Dilatak juo ka balakang
Alah nyato tuan den indak kan
Ndak ka mungkin cinto tuan bakasampaian.”
Di baleh dek Si Samiang ucapan si Randin,
“Adiak dangakan den katokan
A nan indak di rimbo
Antah kok bamban jo katari
Bamban buliah dilingkakan
A nan indak di Kito
Antah kok bulan jo matohari
Bulan buliah den ambiak kan.”
“Alah tu mah tuan, jajok den mandangakan, sakali indak den katokan, usah ang sabuik barulang.”
“Ondeh Puti nan mantiak muluik, alah basaba den dangakan, nan kau makin balanteh angan, asa kau tau,
Marokok denai makan Siriah
Sambia bajuntai ateh pamatang
Jikok indak talok kau dek pakasiah
Si jundai lai nan ka datang,
Limau puruik limau katuri
Katigo jo limau kambiang
Kok indak manuruik kau mati
Kok indak mamanjek dindiang.
Kini ba itu malah nan ka elok, rancak den Pai bakirok.”
***
Pandeka Samiang Pai bajalan, ditinggakan si Randin surang, wakatu taruih juo bajalan, kini si Samiang sampai pulo ka daerah Lubuak Landua, tampek tingga Buya nan tanamo. Dek hari batambah siang juo, nan paruik batambah litak pulo, nan pitih di saku lah indak ado, dicaliak di tapian aia Lubuak Landua, lauak nyo gadang-gadang, kok lai dapek di panggang, dapek pulo mambuek kanyang.
Di caliak urang sabalik indak ado, tibo niaik cilakonyo, lauak di ambiak baitu sajo, indak tau urang nan punyo, Samiang taruih mamakan, indak manghiraukan doso nan ka datang.
Tasabuik dalam carito nyo, itu lauak balarangan, siapo pun nan mamakan, alamaik ka taniayo gadang. Ruponyo batua carito urang, sasudah makan sampai kanyang, paruik si Samiang manggambuang gadang, lamo bakalamo an, paruik nyo makin gadang, indak lai ado urang nan bisa manolongan, si Samiang tabujua di tapian, babaun anyia sarupo lauak nan nyo makan.
Samantaro nan dek si Puti Randin manangih manukiak, sarupo urang kurang aka, raso rangguik jantuang jo hati, raso rangguik nyawo jo badan, baru lah disinan Randin tasadar, takana si Samiang nan inyo caci inyo Hino. Di caritoan malah dek Puti randin ka bakeh ayahnyo, apo ka sabab panyakik nyo.
Bakato si Ayah Randin, “Nak kanduang sibiran tulang, sajak dahulu Ayah katokan, tapi indak kau danga kan. Kok mangecek usah ba si lancang, kini badan kau nan manangguangkan.”
Di cari dukun pandai ubek, untuak ma ubek si Puti Randin, namun takadia bakato lain, alun dicari si dukun sati, nan Puti Randin alah dulu mahadap ka ilahi, alah cilako binaso pulo.
Tamat
Penulis
Zaitun ul Husna, lahir di Rimbo Binuang, 14 Februari 2002 daerah Pasaman Barat. Memulai mendalami dunia literasi sejak duduk di bangku perkuliahan. Sekarang tercatat sebagai mahasiswa Universitas Imam Bonjol Padang. Jejak bisa ditemukan di akun instagram @una_husna14 dan akun twitter @ulhusna14. Sebuah motto yang selalu dipegangnya, yaitu Manjadda wajadda.
