Oleh : Zaitun Ul Husna
Kaik bakaik aka di rimbo
Takaik aka nan bapunta
Sampai kalangik manjadi carito
Tibo di bumi manjadi kaba.
Lah banyak carito nan ambo karang
Kini ambo cubo pulo manulih carito roman daulu
Antah iyo antah ko tido, nan jaleh ambo cubo.
Kok indak batua itu garan
Carito ambo buek sajo
Ado eloknyo kito baco, jadi patunjuak jo pangaja
Usah di kito tibo pulo, iyo carito sarupo Iko.
Bamulo iyo carito nyo, tasabuik di daerah Simpang Ampek, daerah urang Pasaman, banamo nagari Lingkuang Aua. Adopun pado maso itu, nagari nan Sadang bakambang, banyak urang kampuang subarang, nan datang manumpangkan untuang.
Tasabuik carito Pandeka Samiang, paja bagak nan datang ka Simpang Ampek. Adopun tanah lahianyo, baasa dari kampuang batang Saman. Pandeka Samiang kok di caritokan, awak rancak lihai bacakak, kuliknyo iyo nan itam manih, manjadi incaran anak gadih. Tapi sayang pangananyo saketek kurang, mano mandeh kanduang nan inyo lawan. Indak sakali-duo kali nyo mahariak, kok kandaknyo nan indak lapeh.
Acok taisak si Mandeh Rubai, jatuah ka dalam si aia mato, mancaliak anak nan indak tau baleh budi. Si Samiang iyo lah anak durhako, siang malam pai bajudi, habih nyo gadai harato pousako.
Takisah malah samaso itu, hari nan sadang pukua duo, urang nan sadang sibuk jo karajo. Bajalan si pandeka samiang, iyo nan ka arah kampuang urang Katimaha. Sampai di Musajik Parik Batu samaso itu, si Samiang baganti agak sabanta, malapeh panek bajalan. Dilatak an ayam nan tadi inyo kundang, di patiak rokok agak sabatang. Dek ulah talamapau lamak duduak bamanuang, nan rokok taruih ba isok juo, tagak si Samiang dari duduaknyo, hari nan ampia parembang patang. Kok raso panek iyo lah hilang nan dari badan, pandeka Samiang malanjuik an parjalanan, iyo untuak pai bataruah manyabuang ayam.
Jalan jauah nan alah batampuah, hanyo untuak pai bataruah. Sampai kutiko itu, di kaluakan si ayam jago, iyo nan punyo si Pandeka Samiang. Di tampek nantun ado pulo ayam jago, iyo punyo si buyuang labiah. Ugang sabalik taruih basorak, mancaliak duo ikua ayam sadang bacakak. Moh lah kito caliak ayam jantan si Pandeka Samiang, kok badannyo iyo ketek, tapi muncuangnyo sabana basangek. Sakali-duo kali inyo mancangkua, abih ayam si Buyuang Labiah jatuah tasungkua.
***
Indak dapek di kato, nan hari batambah patang juo, parmainan nan alah usai, ayam si Labiah alah marasai. Urang sabalik alah manampak, kalau ayam si Labiah jatuah tacampak, ditangkok maso itu dek si Pandeka Samiang ayam jantan nyo, di masuak kan kambali ka tampek Samulo.
Bakato si Pandeka Samiang wakatu itu, “Mano lah waang si Buyuang labiah, ugang bagak iyo tanamo Pandeka Gadang di Katimaha. Ayam ang ancak di gulai sajo, inyo iyo indak mambari guno, hanyo mambuek malu sajo. Kini capek malah ang kaluaan, ameh jo perak nan bajanjikan. Ambo nio babaliak pulang. langik nan alah baransua kalam.”
Mandanga kato si Pandeka Samiang, tabik bangih nan jo cilakonyo, marabo inyo indak tabedo, tasirok darah di dalam dado, Pandeka Samiang indak bautak, si Labiah di pamalukan di muko urang banyak.
Karano hati nan alah talanjua sakik, di jawek malah kato si Pandeka Samiang. “Tuan den Pandeka Samiang! Pandeka bagak indak babudi, pado ameh jo perak den tuan baok, angok den baok daulu, bukan den takabua pado Allah, denai nak mancubo kapandaian tuan. Denai danga tuan Pandeka, moh lah kito cubo agak sabanta, nak tau di sakik iduik, nak tau di angek dingin, ijan pandai mangecek sajo!”
Urang sabalik hanyo mandanga, duo pandeka sadang batangka, Pandeka gadang pandeka bagak, iyo si Samiang jo Buyuang Labiah.
Mandanga panuturan si Buyuang Labiah, maludah si Samiang ka sabalah kida, jajok mandanga ucapannyo, alah nyato ayamnyo kalah dalam lega, kini si Samiang pulo nan nyo ago.
Dek si Sampiang pandeka Pulo, di jawek malah kato si Labiah. “Ondeh tuan den si Buyuang Labiah, baok batanang agak sabanta, usah tuan nan marabo, urang parabo capek tuo. Indak elok tuan pambangih, urang pambangih ilang aka, indak elok urang pancameh, urang pancameh kailangan. Elok saba kan hati tuan daulu. Tapi kok samantun baitu pintak tuan, kato tuan ambo jawab, kok gayuang ambo sambuik, legaran tipak di ambo, di hari nan sahari nangko, ijan kan malawan tuan sa urang, malawan kasadonyo ambo indak ka gamang.”
Di jawek dek si Buyuang labiah, “Gadang kecek paja nangko, liek lah dek waang padang ambo, padang salaweh daun pisang, bukan saketek mambunuah urang, antah kok kini waang nan jadi giliran.”
Di jawek baliak dek si Pandeka Samiang, “Den bari tau tuan saketek, bapantang dek denai suruik ka balakang, jo kato nan alah baucapkan. Asa tuan tau sajo, paja kaciak nan tagak surang nangko, bapantang karam di lauik, bapantang mati di Rimbo. Antah kok mati tangah rumah, satantang baitu kato tuan, tuan caliak pulo padang ambo, padang sati pamutuih rantai. Den sintak inyo bakato, den suruang kan bamego-mego, asam darah kiliran dagiang, tibo di tulang lamak manih.”
Dilayangkan padangnyo dek si Labiah, iyo ka arah Pandeka Samiang. Pandeka Samiang dek santiang mailak, inyo jago pulo dalam bacakak, badan tubuahnyo nan tampan rancak, indak saketek pun nan rusak. Adopun dek diri Buyuang Labiah, badannyo nan taniayo, sabalik badannyo alah luko-luko, nan ijau lambam dek kanai sipak ado pulo.
Legaran taruih balanjuik, nan si Labiah pun pantang untuak manyuruik. Namun takadia bakato lain, jatuah tasungkua si Buyuang Labiah, di angkek padang tando manyarah. Tipak di badan si Labiah kini, alah panuah dek luko-luko, alah sansai dek galimang darah.
Mancaliak diri si Buyuang Labiah, bakato si Samiang, “Dangakan dek tuan pantun ambo,
Kok mandi usah di banda
Di banda urang Simpang Ampek
Kok mati usah manyasa
Bamain jo paja ketek
Ambo lah pandeka Samiang, urang gagah nan bukan alang-alang, kuek nan indak buliah di lawan.”
Tipak di badan si Buyuang Labiah, indak dapek mangarik lai, maaf jo pinto nan ba ucapkan, sarato ameh jo perak nan basarahkan, iyo ka bakeh Pandeka Samiang. Tipak di badan si Samiang, sanangnyo bukan alang-alang, ameh jo perak nan di bao pulang, manang bataruah di kampuang urang.
***
Di caliak langik batambah kalam, nan hari pun baransua malam, si kokoh babunyi di suduik jalan, hari nan Sadang pukua anam, baranjak si Samiang barangkek pulang, handak manuju ka rumah Mandeh kanduang.
Sadang kutiko si Samiang bajalan, iyo handak manuju pulang, batamu malah jo gadih rancak. Awak rancak tinggi samampai, kulik putiah rambuik bagerai, bajalan malenggok-lenggok, ciek ka kida, ciek ka suok. Mancaliak gadih nan rancak nantun, tumbuah cinto di hati Samiang., bamulo Samiang manyapo, di rayu jo kato-kato. Tapi nampak jo ruponyo, si Samiang salah caro, Puti Randin indak gadih sumbarang gadih, inyo padusi nan tapandang, anak urang kayo gadang, basawah laweh kabau baribu, ba toko ameh bakadai baju, ba palak cangkeh ba ladang tabu, mano lah sapadan jo si Samiang nan panjudi gadang, manyabuang ayam tiok patang.
Tipak di badan Samiang mancubo juo, antah ko si Randin tabujuak Jo gala Pandekanyo, tapi sayang harok nan alah di tanamkan, indak ado basingguangan. Randin tau jo rancaknyo, inyo tau jo haratonyo, manolah ka tabujuak dek rupo, apo lai jo gala pandeka sajo.
Si Randin kok ka dibaco, awak rancak muluik babiso, indak tau urang ka tasingguang, indak sadar urang ka sakik hati. Di hari nan alah barabuik sanjo, bajawek kato antaro si Randin Jo Pandeka Samiang.
“Ondeh Puti nan rancak rupo, bajalan surang di hari sanjo, handak kamano Puti ka malangkah, siapo tau kito lai saarah, bia ambo anta sampai ka janjang rumah.”
Mandanga panuturan si Samiang, takajuik Puti Randin bukan alang-alang. “Oi … sia nan tagak di muko den ko, jikok ubilih ancak bakirok, usah di dapan den manyarok, jikok manusia tolonglah bakisa, bari den lalu agak sabanta.”
“Ondeh Puti nan rancak rupo, bungo kambang di tapi jalan. Bukannyo denai ubilih rimbo, denai ko hanyo urang biaso,” baleh si Samiang.
“Lai manusia waang kironyo,” katonyo Puti Randin. “Adaik mano nan ang pakai, limbago mano nan ang tuang, lah nyato gadih sadang bajalan, waang marayu bakalamak sajo, indak ang tampak hari alah barabuik sanjo!”
“Ondeh Puti kato denai, usah Puti berang sajo, urang pamberang capek tuo. Dangakan malah nan dek Puti,
Hari sanjo langik bamego
Hari patang bapanen manggih
Balain pulo anak gadih disiko
Batambah berang batambah manih
Nak duo pantun sa iriang,
Anak urang koto Marapak
Bajalan sa iriang di hari sanjo
Adiak kanduang cubo lah galak
Buliah nak sanang hati ambo.”
“Usah ang ulang ka duo kali, maramang bulu kuduak den. Sungguah pun layia nan ang bantuak, kapa di lawuik nan ang kamudi, sungguah pun tanah nan ang lambuak, anggan den ka jatuah hati. Lai jaleh dek waang tu?”
Antaro Puti Randin Jo Pandeka Samiang, masih sajo bajawek kato.
“Ondeh Puti kato denai,
Kok lai dapek minum kopi
Den bao bajuntai ditapi pamatang
Kok lai dapek kandak di hati
Bia tajua sawah jo ladang.”
Hati nan mulai indak tasabakan, di jawek dek Puti Randin kato Pandeka Samiang untuak kudiannyo, sabalum Randin baranjak pai.
“Tantang harato nan ang sabuik, mahitam kabau di ateh bukik, mamutiah jawi di tangah ladang, ba heto sawah jo ladang ang, alun cukuik untuak pambali badak den!”
(Bersambung …)
Penulis
Zaitun ul Husna, lahir di Rimbo Binuang, 14 Februari 2002 daerah Pasaman Barat. Memulai mendalami dunia literasi sejak duduk di bangku perkuliahan. Sekarang tercatat sebagai mahasiswa Universitas Imam Bonjol Padang. Jejak bisa ditemukan di akun instagram @una_husna14 dan akun twitter @ulhusna14. Sebuah motto yang selalu dipegangnya, yaitu Manjadda wajadda.
